شخابيـــــــــط ...

[أبــو الليل]

إهـــداء

يسر مجلس ادارة الشخابيط ( انا يعني بس بترسم )
تقديم هذا الاصدار بناء على طلب خاص من شخص عزيز
وقد وعدناهم .. وها قد وفينا بالوعد
وهكذا يثبت ابو الليل ان الوعد الصادق
يختلف كليا عن الوعود اللي بأستك بتاعة الحكومة

مع تحياتي

(1)

تعريف الشخابيط : هي بعض الانطباعات الشخصية لأبو الليل .. ممكن تكون الانطباعات عن حاجات حلوة وممكن تكون عن حاجات بنت ستين في سبعين .. المهم ان هذه الانطباعات ترسل من مخيخ ابو الليل على شكل موجات كهرومغناطيسيه الى اصابع ابو الليل (برضو ) فتقوم الصوابع لامؤاخذه يعني بكتابتها على الكيبورد . ولا عزاء للقراء

(2)

يعني ايه كلمة وطن ؟ يعني ارض ؟ حدود ؟ مكان ؟؟ ولا حالة من الشجن !

الله يا محمد يا فؤاد يا ( تخين ) .. بحب الاغنية دي جدا .. احيانا ينتابني شعور بأنها أجمل وأبسط كلمات شرحت معنى كلمة ( الوطن ) بكل بساطه .. هل فعلا نعرف معنى كلمة ( وطن ) ؟
هل الوطن هو المكان ؟ هل هم الاشخاص ؟ الام والاخت والاب والاصدقاء .... الخ ..
هل الوطن مجرد وصف يكتب في جواز السفر ؟ هل الوطن هو اللغه التي نتحدث بها ؟

من انت ايها الوطن ؟

لماذا نحبك ونشتاق اليك ؟ لماذا نختلف معك ونكرهك احيانا ثم نعود لعشقنا لك ؟
هل الوطن كأسمائنا مثلا ؟ يولد معنا ولا نختاره ..
مهما كنت ايها الوطن .. فأنا أحبك وأشتاق لك .. أبكي عندما يساء اليك .. وافرح عندما تكون بخير

لا ادري ما الذي دفعني للكتابه عن الوطن .. ربما هو الاشتياق او احساسي بالغربة

اشتقت لك يا وطن ... اشتقت لشوارعك وحواريك ..
اشتقت للجلوس على كوبري قصر النيل بعد منتصف الليل .. ادلدل رجلي من سور الكوبري .. انظر لمياه النيل وانعكاسات الاضواء على سطح الماء .. اسرح .. افكر .....

اشتقت للجلوس ساعة العصاري على قهوة عم صبحي .. اشتقت الى فوزي الاقرع اللي كل حياته ملساء زي قرعته .. اشتقت لوجبة الكبده والمخ الكومبو من عند عم سيد ..سندوتشات البطاطس الصوابع من عند البرنس طحينه بس بدون سلطه .. اشتقت لمسجد سيدنا الحسين .. للطريق الصحراوي وانا رايح اسكندرية وللبحر الاسكندراني والكبده الاسكندراني برضو ..

لما بكون راجع مصر .. اول ما ادخل المطار والاقي العسكري باللبس الابيض في الصيف او الاسود في الشتا ... غلاسة سواقين التاكسي .. رخامة الشحاتين .. مولد السيده زينب ........

اااه يا بلد يا بنت ال ...
بحبك

بحبك بجد

(3)

رسالة الى / ايهاب خيري .. اعز واغلى صديق في الدنيا

تعرف انك قليل الادب و معندكش دم ؟ ماترد يا روح خالتك ساكت ليه ؟
طبعا معندكش كلام تدافع بيه عن نفسك .. ماهو العيب مش عليك .. انا اللي استاهل ضرب الجزمه علشان كنت بعتبرك اعز صديق ليا ... ليه تعمل فيا كده ؟؟ ايوة ايوة اعمل عبيط ومش سامع.. ماترد ساكت ليه ؟؟ منتا جبلة ومبتحسش ... ايه البرود اللي انت فيه ده ؟ اخر حاجه كنت اتوقعها منك انك تخون العيش والملح اللي بيننا !!تخون صاحبك اللي في يوم خدت معاه عهد
عهد الاخلاص لصداقتنا لاخر يوم في عمرنا ... فاكر ولا نسيت ؟
من اول يوم في الجامعه .. لا فلوس ولا بنات ولا اي زفت على دماغك قدر يهز اللي بيننا او يفرقنا
عشناها عالحلوة و المرة .. بكينا وضحكنا واتجننا وعقلنا وهرتلنا سوا ...
شطحنا شوية ورجعنا ربنا هدانا وشطحنا تاني واهتدينا تالت .. كنا دايما مع بعض
فاكر ياض ولا نسيت ؟؟؟؟ انت مبتردش عليا ليه ؟ فين لسانك الطويل ؟؟
منتا علشان غلطان مش هتقدر ترد .. اصلك واحد ندل وخاين
مكنتش تعرف يعني انك غالي عندي واني مش هصاحب حد زيك تاني؟
ليه تعمل كده في صاحبك ؟
ليه يا اعز صاحب ؟
ليه يا صاحبي ؟
ليه تموت وتسيبني ؟

4 سنين فاتوا على رحيلك يا ايهاب .. اللهم لا اعتراض .. وانا بكتب عنك قلبي وجعني ومعرفتش احوش دموعي عليك .. انت مش هتغلى على اللي خلقك .. بس وحشتني .. بجد يا صاحبي وحشتني اوي ..
الله يرحمك يا صاحبي ..

(4)

الكتابه في المنتدى .. اي منتدى .. سواء كانت كتابتك من تأليفك او بتنقلها او حتى لو مجرد رد على اي موضوع .. بحس ان الكتابه من النوع ده بتخلي لكل واحد صورة عند الناس اللي بتقرأ كلامه .. ملك .. اميرة .. ملاك .. شيطان .. حورية .. لكن كل دول في الاخر بني ادم .. اه واللهي بني ادم ...

فكرت شوية وقلت .. هي الكتابه دي ايه غير بلكونه ؟ بلكونه فاتحها على روحي .. اما اني مجملها علشان الناس والله اعلم باللي في النيه .. او ان البلكونه دي مجرد منشر .. انشر فيها هدومي علشان تكون نضيفه .. او ان البلكونه علشان اغير فيها جو الخنقة واقعد اتكلم مع صاحب او صاحبه ونرغي ونفضفض .. ويمكن البلكونه علشان تطلع تتخانق وتشتم الجيران ...

ياخي ام التكنولوجيا على ام العولمه ..
ياريت ياللي انت مش عارف انا ايه ومين تقولي بلكونتي فيها ايه ؟
اصل نور عندي لمؤاخذه يعني .. مطفي !!

(5)

المذيعه : ايه رايك في انجازات الحكومه
انا : ايوة .. تمام تمام .. ربنا يخليهم لينا يا رب
المذيعه : ايه رايك في القنوات الفضائية المسمومه التي تحاول النيل من سمعة مصر ؟
انا : ايوة .. تمام تمام .. ربنا ياخدهم يارب
المذيعة :ايه رايك في اهتمام السيد الرئيس بحل مشاكل الشباب
انا : ايوة .. تمام تمام .. ربنا يديه الصحه
المذيعه : ايه رايك في دعم الصناعات المحليه للحد من الاستيراد ؟
انا : ايوة .. تمام تمام .. المنتج المصري ميه ميه وزي الفل
المذيعه : ايه رايك في الفن المصري اللي متميز جدا جدا ونجومنا ماليين شاشات العالم ؟
انا : ايوة .. تمام تمام .. فعلا احنا اصخاب رياده فنيه هايله وربنا يخلي نجومنا
المذيعه : ايه رايك في صحافة مصر الرائده ومقدار الحرية و..و..... ؟
انا : ايوة .. تمام تمام .. صحافتنا حرة وشجاعه وبتعرض مشاكلنا .. يارب احفظ روز اليوسف والاهرام
المذيعه : تحب تسمع اغنية ايه ؟
انا : اخترناك اخترناك .. ولو مش موجوده يبقى اي حاجه لمحمد ثروت
المذيعه : ايوة .. تمام تمام

ملحوظة : على ما يبدو ان الاستاذ ( انا ) كان شارب بانجو قبل بداية البرنامج !!!

انتهى ...

أبو الليل

[AdMiN.Mr.NiCoLaS]

حلوة اوى الشخبطة دى
لا جامدة واللهى
اكتر حاجة عجبنى الجملة دى

اشتقت للجلوس على كوبري قصر النيل بعد منتصف الليل .. ادلدل رجلي من سور الكوبري .. انظر لمياه النيل وانعكاسات الاضواء على سطح الماء .. اسرح .. افكر .....

انا فعلا بحب النيل اوى وبعد الساعة 12 او 2 باليل
بروح انا وصاحبى كتير هناك لما بخرج
بس مش بدلدل رجلى بقة
شكرا ليك وومستنى شخبطة تانية بقة قريب

او ابقة قسم الشخابيط كل يوم جزء مشخبط فى نفس الموضوع يعنى شخبطاية شخبطاية

[أبــو الليل]

موضوع النيل ودلدلة الرجلين ناقص ازازة بيرة ساقعه ونفسين والهوا يلطش بأه بس قلت بلاش حتى لا نكون من المحرضين على الانحراف

اما عن الشخابيط شخبطايه شخبطايه فكده الشخابيط هترطرط في السوق
وكمان الشخابيط تكتر وتتكاثر وبتاع زي الفراخ

اشكر مرورك يا باشا وان كنا معملناش الواجب ولا كباية شاي ولا حاجه

وتحياتي

[Mr.DeStRoYeR]

هل الوطن مجرد وصف يكتب في جواز السفر ؟ هل الوطن هو اللغه التي نتحدث بها ؟
من انت ايها الوطن ؟

مترد علينا يا عم خليت الواحد يخرج عن شعوره ............
موضوع جامد يا بو الليل في انتظار الشخبطه الجايه
وابقا بيعهم بالجمله يا عم ولا تزعل نفسك

[ur-hero]

جميله الشخابيط بتاعتك ابو الليل
وبالنسبه لحكاية لما الشخابيط
ترترط فى السوق هتبقى مشكله كبيره طبعا
لحسن يقولوا انفلونزا الشخابيط واللى عنده
شخبوطين يدبحهم والكلام ده
اوعى يا ابو الليل تسمع كلام الواد نيكولا ده
لحسن الشخابيط تنتقرد
واحنا عاوزين شخابيط حلوه من بتاعتك دى تانى

[أبــو الليل]

المدمر

هيرو

شكرا لمروركم ونورتوني

بس زي ما قلت .. دي كانت اصدار خاص

حاجه كده يعني معمولة عمولة

تحياتي يا رجاله

[وعد الحر]

رسالة الى / ايهاب خيري .. اعز واغلى صديق في الدنيا


تعرف انك قليل الادب و معندكش دم ؟ ماترد يا روح خالتك ساكت ليه ؟
طبعا معندكش كلام تدافع بيه عن نفسك .. ماهو العيب مش عليك .. انا اللي استاهل ضرب الجزمه علشان كنت بعتبرك اعز صديق ليا ... ليه تعمل فيا كده ؟؟ ايوة ايوة اعمل عبيط ومش سامع.. ماترد ساكت ليه ؟؟ منتا جبلة ومبتحسش ... ايه البرود اللي انت فيه ده ؟ اخر حاجه كنت اتوقعها منك انك تخون العيش والملح اللي بيننا !!تخون صاحبك اللي في يوم خدت معاه عهد
عهد الاخلاص لصداقتنا لاخر يوم في عمرنا ... فاكر ولا نسيت ؟
من اول يوم في الجامعه .. لا فلوس ولا بنات ولا اي زفت على دماغك قدر يهز اللي بيننا او يفرقنا
عشناها عالحلوة و المرة .. بكينا وضحكنا واتجننا وعقلنا وهرتلنا سوا ...
شطحنا شوية ورجعنا ربنا هدانا وشطحنا تاني واهتدينا تالت .. كنا دايما مع بعض
فاكر ياض ولا نسيت ؟؟؟؟ انت مبتردش عليا ليه ؟ فين لسانك الطويل ؟؟
منتا علشان غلطان مش هتقدر ترد .. اصلك واحد ندل وخاين
مكنتش تعرف يعني انك غالي عندي واني مش هصاحب حد زيك تاني؟
ليه تعمل كده في صاحبك ؟
ليه يا اعز صاحب ؟
ليه يا صاحبي ؟
ليه تموت وتسيبني ؟


4 سنين فاتوا على رحيلك يا ايهاب .. اللهم لا اعتراض .. وانا بكتب عنك قلبي وجعني ومعرفتش احوش دموعي عليك .. انت مش هتغلى على اللي خلقك .. بس وحشتني .. بجد يا صاحبي وحشتني اوي ..
الله يرحمك يا صاحبي ..

وجعت قلبى معاك يا راجل حرام عليك ليه بس كدا
الله يرحم الجميع
تعرف يابو الليل انى وحيد معنديش اخوة رجالة وان ليا اربع بنات بطلب من ربنا انه يدينى العمر عشان اقدر اعوضهم حنان الاب اللى توفى هو كمان من 24 سنه .
ومع ذلك حزنى على ابن عمى اللى توفى من 13 سنه بيشق صدرى لغاية النهاردة
تسميه ايه غير انه ظلم من الدنيا استغفر الله العظيم
ان صديق عمرك اللى كنت تعتبره مثلك الاعلى واخوك وابوك وكل عزوتك فى الدنيا يروح منك كدا بدون سابق انذار اة انك تعمل حسابك للفاجعة اللى هتقابلك فى حياتك .
انا مزعلتش على وفاة والدى لكن حسيت بغيابة بعد ما كبرت لانه توفى وانا عمرى 5 سنين .
لكن اشرف والله كان اشرف انسان عرفته على وجه الارض .
يوم وفاته حسيت انى يتيم بجد وان ما عادت تفرق معايا بعد كدا .
كان عندى 16 سنه وهو كان 19 وفجأءة بقى ذكرى لكن فات 13 سنه وانا لسه ببكى عليه لغاية اللحظة اللى انا بكلمك فيها دلوقتى .
معلش فتحت سيرة مش قادر انساها ابدا ولا اصبر عليها كمان وكل ما تقدم بى العمر بحس انه لسه معايا بس عارف انه هيموت عشان كدا حزنى بيزيد عليه كل ما اتخيل انه هيسيبنى ويمشى
كفايه عشان لو قعدت اتكلم مفيش حد هيقدر يكمل كلامى
تحياتى ليك وياريت تكتر من الشخابيط دى عشان نفوق .قصدى نتوه فى الدنيا يمكن نعرف هدفنا ويقابلنا بالصدفة واحنا تايهين ونقدر نحدد احنا عايزين منها ايه بعد كل اللى بتعمله فينا 0

لله الامر من قبل ومن بعد

[أبــو الليل]

ربنا يرحم امواتنا واموات المسلمين جميعا يا وعد ويرحمنا احنا كمان

انت عارف لما تفقد صديق بجد ومن بعده متلاقيش حد مش يعوض مكانه لأ نص او ربع مكانه حتى

انت في زمن يا عزيزي الصداقة فيه عاملة زي البطيخة الحمرا في الشتا

شكرا يا باشا لمرورك ونورت الموضوع وعلى فكرة انا ضفتك عندي بس انت لسه قافل الدكانه قصدي يعني الماسنجر

تحياتي ليك

[frafero]

أولا ميرسى ليك ابو الليل حقيقى المنتدى منور بشخابيطك " ههههههه" تسلم إيديك ومنتظرين المزيد والشاى اللى مشربهوش نيكولاس عندى بمناسبة رجوع الشخابيط والأعضاء كلهم معزومين على الشاى ونحكى فى الشخابيط شوية ...

[أبــو الليل]

شكرا ليكي فيرو

المنتدى منور بيكي وبباقي الاخوة الحرافيش

وبالنسه للشاي ياريت شوية بقسماط معاه

ونورتي الموضوع بمرورك

تحياتي