احنا بتوع النووي .... !!!

[أبــو الليل]

تصريحات رئيس الجمهورية المصري حسني مبارك الاخيرة بشأن البرنامج النووي المصري ومن قبله نجله الأمور جمال والذي كان صاحب ضربة البداية في الاعلان عن هذا المشروع .. ولا أدري السبب الحقيقي في أن يبدأ جمال في الاعلان عن نية مصر احياء البنامج النووي قبل والده !

يمكن لأن جيمي كبر وآن الأوان لتلميعه وتقديمه للبسطاء من اهل مصر على انه المنقذ والفارس المنتظر الذي سينقلنا الى العصر النووي المباركي الجديد واستمرارا لمسرحية التوريث الفاشلة التي يصرون على لعب ادوارها بالرغم من علمهم ان الشعب المصري يرفض هذه المسرحية الهزلية

ما علينا ...

اسمحوا لي أن أشطح بخيالي قليلا مع هذه التصريحات النووية الجديده ونحاول أن نقرأها جيدا ونضع جميع الاحتمالات والتباديل والتوافيق ونحاول ان نعي ما يدور حولنا


الاحتمال الأول : الغرض اضافة لقب

من الجائز ان لا يكون هناك نووي ولا بطيخ والحكاية كلها كلام في كلام ..
وبما ان الريس صاحب لقب بطل الحرب والسلام وصاحب اول ضربة جوية اللي فتحت باب الحرية
وبعد التصريحات هيكون الرئيس النووي واهو لقب جديد علشان صحافة الاهرام والاخبار والجمهورية يلاقوا حاجه يكتبوها ..
وممكن نلاقي ممتاز القط كاتب في عيد ميلاد الريس : كل سنة وانت نووي ياريس !!!



الاحتمال الثاني : خطأ في الترجمه

احتمال ان يكون الريس قد قرأ الكلمة بشكل خاطئ لاعتبارات السن وضعف النظر .. فمن الممكن ان يكون كاتب الخطاب قصد ( البرنامج المنوي ) وليس النووي .. على اعتبار ان الرئيس مبارك من يوم ما مسك الحكم وهو في كل خطاب يقول : خفوا بالليل شوية ... يقصد تحديد النسل علشان الشعب كتر أوي 75 مليون في عين العدو
ومش عارف يعني عدد السكان مضايق الريس في ايه ؟؟ نموتهم يعني علشان ترتاح انت وعيالك ؟
طيب ما الصين مليار وشوية والناس عايشه .. ايه مشكلتك مع السكان مش فاهم انا .


الاحتمال الثالث : كلام كذب لأغراض السرقه والنهب

من الجائز ان يكون الموضوع ببساطه ان الحكومه مزنوقه في قرشين وقالت نعمل مشروع نقول عليه انه نووي ونبني سور جواه بيت دورين ونقول هو ده المفاعل النووي وانه اتكلف كام مليار .. وطبعا محدش هيفتش وراهم وخصوصا ان امريكا واسرائيل موافقين على المشروع ومش عارف من امتى الحداية بترمي كتاكيت !!


الاحتمال الرابع : أن يكون الموضوع هزار

طبعا احنا عارفين ان الريس بتاعنا بيحب يهزر ودمه خفيف وفي كل خطاب او مقابله لازم ينكت ويقول قفشه بدمه ( الخفيف ) علشان الناس تضحك .. فيمكن يكون الريس بيهزر يا شعب .. على اعتبار اننا شعب دمه خفيف وابن نكته .. وهيرجع بعد كده يقول : مرة واحد صعيدي جه يعمل نووي ... هاهاها وبتاع ... هزار !!!



الاحتمال الخامس : ان يكون المشروع النووي حقيقه

هنا الكارثه ....

يا نهاركم اسود ... نووي ايه اللي عاوزين تعملوه ؟؟؟

جتكم ستين نووي .. قصدي ستين خيبه ..

طيب مش تتعلموا تسوقوا القطارات الاول وتبطلوا حوادث .. او تتعلموا تمشوا العبارات في البحر الاحمر اللي كل سنة تغرق منهم واحده لغاية لما مبقاش عندنا عبارات !!
او على الاقل ابنوا عمارات جامده مش اللي كل شوية تقع وتموت كام واحد
او ارصفوا شوارع البلد اللي اتملت حوادث سير

طيب بلاش دي ..

شغلوا ال15 مليون عاطل وجوزوا ال8 مليون عانس وبعدين فكروا في النووي !!

بلاش دي كمان ...

طيب فرضا انكم عملتوا مفاعل نووي يا حكومه .. وجه الراجل الغفير بتاع المفاعل بالليل عاوز يشرب كباية شاي يعدل بيها نفوخه .. وبعد ماشرب الشاي نسي يطفي الوابور فحصلت حريقه والمفاعل ولع !!

ساعتها هتحصل كارثه من غزة للقاهرة لطرابلس للخرطوم .. والمنطقه كلها هتموت بسبب الاشعاع ..!!

وتكون ولا حادثة تشرنوبل .. تشرنوبل مين !! دي فيها ملايين الملايين هيموتوا !!!

اه يا بتوع النووي يا ولاد ال ... !!!

وعندك واحد شاي باليورانيوم وحجر معسل نووي ... وصلحه



أبو الليل

[frafero]

الاحتمال الثالث : كلام كذب لأغراض السرقه والنهب

من الجائز ان يكون الموضوع ببساطه ان الحكومه مزنوقه في قرشين وقالت نعمل مشروع نقول عليه انه نووي ونبني سور جواه بيت دورين ونقول هو ده المفاعل النووي وانه اتكلف كام مليار .. وطبعا محدش هيفتش وراهم وخصوصا ان امريكا واسرائيل موافقين على المشروع ومش عارف من امتى الحداية بترمي كتاكيت !
انا بقول انه ده احتمال قريب للواقع عشان منرحش بعيد .. على فكرة موضوع متميز جداا واسلوبه حلو
وحشتنا موضوعاتك يا وليد والف سلامة على عنيك يارب تكون بخير .. ومتنساش تكتبلنا شخابيط حلوة انت ناسينا خالص ... تحياتى

[وعد الحر]

صحيح هيكون عندنا نووى بجد ؟
وهنبقى من الدول المنتجة لليورانيوم ؟
انا لو حلفولى ع المصحف مش هصدق وده لكذا سبب .

الاول :-
الشعب المصرى اصبح الايام دى شعب يتسم بالسطحية وعدم التركيز
والكلام ده سياسة بدأها السادات وكملها بشكل صح مبارك
الله لا يبارك ويجعله عامر
بس مش عيب من المصريين لانهم بقوا مربوطين فى ساقية وطول النهار بيلفوا معاها
طاحونة لقمة العيش اللى بات كتير منهم بيشتهى انه يلاقيها بدون عرق وتعب
مين هيجيلوا وقت يقعد يقرا ويفهم احوال الدنيا ماشية فين وجيه منين وولاده مقضيين عشاهم نوم .

التانى :-
طالما ان الوضع ف المنطقة مش مستقر وان الكلام عن امتلاك النووى صار حلم ملايين البشر فى جميع انحاء العالم وان بعض العقول بتهتف بامتلاك السلاح النووى وان الغالبية العظمى بتقول اننا لو نمتلك القنبلة النووية هنقدر نحمى نفسنا .
يبقى ليه ميزودش احلام الناس عشان يتلهوا عنهم ويمسكوها صح وتبقى بالوراثة ومش بعيد يرجع الحكم الملكى وايام الطرابيش والقلم السياسى .

التالت :-
وده بقى من الايادى اللى بتشتغل والنور مطفى وتشيل الحاجات من اماكنها .
مصر ما شاء الله ف السبعينيات كان الجنية اغلى من الدولار وكان عندنا بداية حلم فى امتلاك السلاح النووى لكن السد العالى وعدم وقوف البنك الدولى جنبنا اسر علينا وطبعا مقدرناش نواصل فى الناحيتين .

الرابع :-
هختصر الطريق وهتكلم عن ايامنا دلوقتى وعن الاقتصاد المصرى فى ظل القيادة الرشيدة تحت زعامة السيد الرئيس والحزب الوطنى .
والديون اللى ماشاء الله بتكتر وبتزيد كل يوم .
ومستوى حياة الفرد ف النازل .
والكوارث اللى بتحصل كل يوم لغاية ما قربت تقضى على البنية التحتية للبلد .
يبقى ليه منزودش حجر فى الساقية وبجوع الحمار اللى بيلف ونخليه داير على طول .

مشروع زى امتلاك طاقة نووية لاغراض سلمية او سلاح نووى للدفاع عن البلد يوم يفتحوا باب المناقشة فيه فى ايام زرقة زى ايامنا دى يبقى عايزين يقضوا على اللى فاضل من اقتصاد البلد وتبقى مجاعة عن قريب وقوولوا يارب .

العجز فى الميزانية العامة فى الدولة يوم يزيد 30 مليار جنية فى خمس سنين هو الهدف اللى بتسعى ليه امريكا واسرائيل عشان ما خفى كان اعظم .

الديون المصرية يوم تفضل كاتمة على نفس اللى خلفونا يبقى مش هنقدر نمتلك الطاقة اللازمة لإدارة مشروع زى ده وبالتالى هيقف زى الللى قبله .

اما مصر يكون عندها مفاعلين واحد 2 ميجا وواحد 7 تقريبا ولا مش عارف كم وميعرفوش يشغلوهم
هيقدروا بجد يسيطروا على مفاعل قوته من 700 الى 1000 ميجا دا لو كانوا عندهم نية امتلاك القنبلة الذرية .

صحيح هنمتلكها
طيب ازاى
هى الامم المتحدة هتسمح لينا وعلى رأسهم امريكا اللى اعطتنا الضوء الاخضر بتنفيذ المشروع صحيح هيسمحوا لينا بتخصيب اليورانيوم عندنا فى مصر .
ولا هنعمل المفاعل ونستورد يورانيوم مخصب جاهز وبعد كم سنة تحصل مصيبة بينا وبين المصدر ونبقى نقلب المفاعل بتاعنا لمزرعة فراخ .

هو احنا نمتلك كم غواصة حربية النهاردة .؟
تقريبا سته مفيهمش ولا واحدة مجهزة للتسليح النووى
طبعا عايزين اسلحة تقدر تتعامل مع السلاح الجديد .
يعنى والله مصر نفسها مش المصريين هتمد اديها وتشحت عشان تقدر تعيش .

وهما هيخسروا إيه واحد بقاله 25 سنة رئيس واهو قرب يموت وابنه هيمسك بعده ودا طبعا على جستى لو حصل وحتى لو ممسكش كفاية عليه الكم مليار اللى بره وهسيبها تضرب تقلب ويعيش حياته زى ماهو عايش هو واللى باعوها وهينزلوا مكرمين على اعداءنا .

إيه رأيكم تعالوا نهتف ونقول لازم يكون عندنا قنبلة نووية .
مش يمكن بعد ما نعملها يضربوا المفاعل بأى حاجة ( مثلا زى الطيارة اللى غرقت فى المحيط والكابت البطوطى اللى انتحر ) ويبقى النووى بتاعنا هو اللى دمرنا .

مش يمكن يكونوا المسئولين عنها عملاء زى سعادة وزير الزراعة كدا ويسيبوا الاشعاعات الذرية تعمل الواجب فى المنطقة ويخلعوا منها .

يلا ربنا يستر .

كويس ياوليد انك اتكلمت على الموضوع
انا والله كنت عايز اتكلم واهو الحمد لله قلت حاجة من اللى كان جواية وانت تشكر انك خلتنا نتكلم
اشكرك اخى وتسلم ايدك
لك تحياتى

[رباط الخيل]

ههههههههههههههههههه
الظاهر حسني مش ح يجبها البر
نووووي يخبر اسووووووووووووود
هو الشعب ناقص
مشكرررررررررررررررين يا عمنا
وربنا يستر

[ايوان من الغردقة]

نصدقو ان كلكم كدة علة بعضكم مش فاهمين حاجة بما فيعم ناقل المووضع لما تعرفو حاجة اسااسا عن النووى ابقو اتكلمو يا حلوين يا مقطقطين

[الفرس الشارد]

أبو الليل تانى

جميل يا أبو الليل

سيبك أنت هى أحسن حاجة مشكلة الغفير االى عايز يشرب شاى دى مصيبة

يعنى الراجل كسر النبوت وولع فيه عشان كباية شاى تحصل كارثة

بس أنا شايف الحل اانه ياخد تعليمات انه لو عايز شاى ياخد البراد ويسخنه

على المفاعل ويطلع مافهاش حاجة

ايه فى حد بيبص عليه مش أنا ده أبو الليل

زووووووووووووووووووو

[glaal]

السلام عليكم..
بجد جامده اوى .... شكرا

[أمير الهكرز]

خفوا بالليل شوية

ههههههههههههه

طيب هو ماله بالليل طيب الزنا انتشر بالنهار

انت يا ابو الليل واقعي 100 /100

مشكور

[sat3536]

مشكواررررررررررررررررررررررررررررررررررررررررررررر رررررررررررررررررررررر

[the_prince_yamen]

هههههههههههههههه
حلوة بس قوية كتير دير بالك على حالك